Luk 2:1-20 – Jisas hem i Stamba blong Krismes

Daonlodem video ia mo serem long ol fren blong yu o soem long jioj blong yu.

Daonlod

Stamba tingting blong pasej ia hem i blong jalenjem yumi blong tingbaot huia hem i man ia Jisas, we hem i bon long wol. Yumi save se hemia i bigfala tingting from we hemia i wanem we ol defren man insaed long pasej oli lanem, o oli tingbaot. Ves 19 i talem se Meri i tingbaot ol samting ia oltaem nomo, mo long ves 20, ol man blong lukaot long sipsip oli presem nem blong God from wanem we oli harem.

Pasej i gat tu defren lukluk long Jisas. Long ae blong wol hem i no kam olsem wan hae man, olsem Sisa we hem i king blong kantri ia Rom, be hem i kam olsem ol manples nomo we i no gat man we oli luksave hem.

Be ol enjel long heven oli save se huia Jisas. Long ves 11, oli talem se hem i kam blong sevem yumi ol man. Mo oli talem se hem i Mesaea, we i minim se hem i king long laen blong Deved we God i promes blong sanem hem blong kam king blong ol pipol blong hem. Mo oli talem se hem i Masta, we wod ia “Masta” i nem blong God long Oltestamen.

Jisas hem i wan king long laen blong Deved we long sem taem tu hem i God stret. Hem i no Mesaea blong God nomo, hem i Mesaea we hem i God.

Wok blong wan king hem i blong sevem ol man blong hem aot long hand blong ol enemi blong olgeta. Jisas hem i wan king we hem i God we hem i sevem ol man blong hem aot long panis blong sin, aot long han blong Setan, mo aot long pao blong ded.

Mekem se long Krismes ia, i gud yumi tingbaot we yumi mas gat Jisas olsem saviour mo masta long laef blong yumi, mo i gud yumi kam olsem ol man blong lukaotem ol sipsip we oli presem God from Jisas, mo oli talemaot hem long ol narafala man.

Jisas hem i stamba blong Christmas mo hem i stamba blong laef.