Ples ia i gat ol app blo putum ol Baebol long lanwis blong Vanuatu long fon blo yu. I gud sipos yumi gat Tok blong God i stap wetem yumi oltaem.
BSSP
Hemia wan nambawan app blong ridim Bislama Baebol long fon. Hem i isi blong yu yusum, mo hem i klia mo i no gat ol narafala samting blong pulum ae o tingting blong yu. Yu save tingbaot Tok blong God nomo.
YouVersion
YouVersion hemi wan app we yu save putum Baebol long hem long plante lanwis blong Vanuatu. Yu save ridim ol Baebol long hem mo yu save lisin long sam lanwis tu (be i kakae kredit blo yu taem yu lisin).
Daonlodem app fastaem. Taem you openem hem fastaem, yu mas statem wan akaon blong yu we yu mas saenin wetem email o Facebook. Afta, app i soemaot lo yu hao blong jusum wanem lanwis we yu wantem. Prestem long spaeglas mo taepem lanwis we yu wantem blong faenem hem kwiktaem. Yu save jenisim hem long sem ples eni taem.
Ol Lanwis we i stap i olsem: Bislama, East Ambae, Kwamera, Lewo, Maskelynes, North Tanna, Paama, Southeast Ambrym, Southwest Tanna, Whitesands.
I no longtaem bae mifala i putumap wan video we i soemaot hao blong yusum app ia.
Bible.is
Bible.is hemi app we yu save yusum blong ridim mo lisin long Niutestamen long plante lanwis blong Vanuatu.
Wan gudfala samting wetem app ia hemi we yu save daonlodem odio blong hem wantaem nomo long fon blong yu. I minim se hem i kakae data blong yu fastaem nomo, be taem yu daonlodem finis yu save lisin hamas taem we yu wantem be i no kakae data blong yu bakegen. Sipos yu wantem daonlodem odio long fon blong yu, prestem ara long lefsaed daon.
Taem yu daonlodem hem, hem i soemaot long yu hao blong jusum lanwis we yu wantem.
Ol lanwis we i stap i olsem: Bislama, Lewo, Maskelynes, Nafe, Nen-naka – North Tanna, Nevhaar – Southwest Tanna, Tangoa, mo Uripiv.
I no longtaem bae mifala i putumap wan video we i soemaot hao blong yusum app ia.
Grup ia we oli wokem app ia hem i Faith Comes By Hearing.
Wan narafala rod we FCBH i givim hemi blong daonlodem ol Baebol app wanwan. Minim se evri wanwan app ia i gat wan Baebol nomo.
Ol app ia i blong android fon nomo (i no blong iPhone). Prestem “Daonlod APK” fastaem, afta yu mas folem tok blong fon blong yu blong instolem hem.
Wan gudfala samting wetem tufala app ia, hemi we taem hemi stap long fon blo yu finis, yu save pasem hem long ol fon blong ol fren blong yu.
Bislama Niutestamen we hemi odio nomo (nogat ol wod blong ridim) (16.6 MB)
Nafe Niutestamen we yu save ridim hem mo lisin long hem long sem taem. (197 MB)
SIL – Wycliff Bible Translators
Wan narafala rod bakegen hemi blong yusum ol wanwan app blong SIL.
Ol app ia oli gat wan lanwis Niutestamen nomo i stap long hem.
Ol app ia oli gat ol wod blong ridim mo odio blong lisin long hem tu. Taem we yu lisin long odio, hem i haelaetem ol wod long ves we i stap ridim.
Daonlodem app fastaem. Afta, taem yu lisin long wan japta fastaem, app ia i daonlodem japta ia long fon blong yu. Be taem hem i stap, hem i stap oltaem nomo. Mekem se, hem i no kakae data blong yu bakegen.
Ol app ia oli blong android fon nomo (oli no wok long iPhone).
Lanwis we oli gat long Play Store hem i: Kwamera (Nafe), Lewo, mo Paama.
Kwamera (Nafe)
Lewo
Paama
Mo yu save daonlodem ol lanwis ia long APK mo putum long fon blong yu: SE Ambrym, mo Uripiv
SE Ambrym Mini Baebol (2.58 MB) Uripiv Niutestamen (2.33 MB)Sipos yufala i save eni moa rod bakegen blong kasem eni Baebol long wan lanwis blong Vanuatu long fon, plis yu talem mo bambae mifala i ademap long ples ia.
Mo sipos eni daonlod o link we mifala i putum i no stret, plis yu talem.
.