Baebol

Olgeta samting long Baebol we i stap long Oltestamen mo Niutestamen hem i kamaot long God fastaem. Plante man oli bin raetem, be from wok blong Tabu Spirit, olgeta wod we oli raetem i Tok blong God stret. Olgeta samting we i stap long Baebol i tru mo i no gat eni samting we i no stret o wanples nating we God i mestem. Taem yumi andastanem stret mining blong hem, tok ia i talem olgeta samting we yumi mas bilif mo we yumi mas mekem blong God i sevem yumi.

God

I gat wan God nomo i stap, i nogat narafala. Hem i no bin bon samtaem mo hem i no gat en blong hem. God hem i Papa, Pikinini, mo Tabu Spirit. Trifala ia oli no bin bon samtaem mo oli no got en blong olgeta. Trifala ia oli God fulwan mo oli wan God nomo. Mo trifala oli defdefren: God Papa i no God Pikinini o God Tabu Spirit; God Pikinini i no God Papa o God Tabu Spirit; mo God Tabu Spirit i no God Papa o God Pikinini.

God i wokem olgeta samting

God hem i wokem evri samting we i stap. From we hem i wokem evri samting fastaem, evri samting we i stap i blong God, mo hem i gat paoa ova long evri samting. Wanem we God i wantem, hem i save mekem.

God i wokem olgeta enjel mo devel

God hem i wokem olgeta spirit we oli stap long heven mo long wol. Olgeta i blong givhan long God. Sam long olgeta i gud mo oli glad blong givhan long God, be sam long olgeta i bin foldaon long sin mo oli stap agensem God, be olgeta tu oli stap mekem wok blong God. Setan hem i olsem lida blong olgeta we oli agensem God, mo hem tu i wan wokman blong God. From we God i wokem olgeta fastaem hem i gat olgeta paoa long olgeta.

God i wokem olgeta man

God i bin wokem olgeta man long fasin blong hem. Mekem se, evri man mo woman long wol oli olsem we oli stap long semak hae praes long ae blong God. From we yumi ol man i mekem nogud, God i kros long yumi evriwan mo yumi kam enemi blong hem, yumi stap aninit long panis blong hem we panis ia hem i ded. Yumi kam olsem we ae blong yumi i blaen mo sore i fas mo yumi no save luksave we God i stap o haremsave voes blong hem, mo yumi no save obei long loa blong hem. Be tru long luv, sori, mo gladhat blong hem, God i wantem tumas blong yumi evriwan i tanem tingting blong yumi, blong yumi kam fren blong hem bakegen.

God i sevem sam man tru long Jisas Kraes

God i mekem wan rod blong hem i sevem yumi tru long Pikinini blong hem, Jisas Kraes, we Kraes ia hem i God fulwan mo hem i wan man fulwan. Taem we Jisas Kraes i hang long kros hem i pemaot pei blong sin blong olgeta man we oli bilif long hem mo tanem laef blong olgeta blong i kam olsem we hem i masta blong olgeta. God Papa i glad from sakrefaes ia we Jisas i mekem from we laef blong Jisas i stret gud olgeta mo from we hem i bin obei long evri samting we God Papa i talem long hem. God Papa i soemaot we hem i glad long wok blong Kraes long taem we hem i givim laef long Jisas bakegen, mo tru long samting ia, God i soemaot we hem i smasem paoa blong ded, mo from hemia, olgeta man we oli bilif long Kraes, oli save se olgeta tu i save folem masta blong olgeta, blong olgeta tu i gat laef we i no save finis. Afta, God Papa i bin leftemap Jisas Kraes blong putum hem long hae ples we i bitim ol narafala ples we i minim se Jisas i gat olgeta paoa ova long evri samting we God i wokem – evri samting we yumi save luk, mo olgeta samting we yumi no save luk, olsem ol spirit mo devel. Naoia, Jisas i stap sidaon long heven we hem i stap askem God Papa blong fogivim ol man blong hem, harem ol prea blong olgeta, mo hem i stap sanem Tabu Spirit blong i givhan long ol man blong hem wanwan, mo bildimap jioj blong hem. Olgeta samting ia i from gladhat blong God nomo, i no from eni wok we yumi i bin mekem, mo hemia nomo i rod blong God i sevem man, i no gat narafala rod bakegen.

Wok blong Tabu Spirit

Olgeta Kristin man wanwan mo jioj blong Jisas Kraes oli dipen long Tabu Spirit. Sipos wan man i bon bakegen blong hem i kasem niufala laef, o sipos hem gru long Kristin laef blong hem, hemia i no wok blong hem wan nomo, hem i mas gat wok blong Tabu Spirit i stap long hem. Tabu Spirit i stap long jioj mo oltaem hem i givim paoa long jioj blong hem i tabu, hem i stanap long trutok, hem i kam waes, hem i stap strong long bilif blong hem, mo hem i mekem wok blong Kraes long wol.

Jioj

I gat wan jioj nomo we hem i blong olgeta ples long wol, mo hem i tabu, mo hem i stanap long wanem we olgeta aposol blong Jisas i tijim. Jioj ia hem i bodi blong Kraes, mo evri man we oli bilif long Kraes oli stap long hem. Jioj i blong mekem wosip i go long God mo mekem wok blong Jisas Kraes long wol.

Olsem we God Papa i sanem Pikinini blong hem Jisas Kraes long wol, Kraes i sanem jioj blong hem i go long wol blong mekem wok blong hem. Stamba blong wok blong jioj hem i blong talemaot tok blong God, tekem Gud Nius blong Jisas Kraes i go long olgeta ples long wol, mo blong tijim ol Kristian man blong oli save gud God Papa mo tekem fasin blong hem. Long sem taem tu, jioj i gat wok blong soemaot fasin blong God long olgeta man long wol tru long gud wok we hem i mekem, tru long fasin blong lav mo pis we i stap long hem, mo tru long ol fasin we hem i tabu mo hem i mekem ol samting we i stret olgeta.

Evri man mo woman long jioj i gat Spirit blong God i stap long olgeta blong oli givhan long wok blong joij. Be Kraes i givim sam man olsem ivanjelis, pasta, mo tija, blong mekem ol narafala memba rere blong mekem wok blong olgeta, mo blong mekem jioj i gru long fasin blong hem kasem taem we hem i olsem wan bodi nomo we Kraes i hed blong hem.

Fasin blong man mo woman

Taem we God hem i wokem yumi fastaem hem i mekem yumi man mo woman, we tufala i defren. From we oli defren, oli save mared, mo mared blong man mo woman, hem i wan pija blong Kraes mo jioj blong hem. Long famle, man hem i hed blong famle we hem i mas lavlavem waef blong hem olsem we Kraes hem i lavem jioj, mo waef hem i mas givhan long man blong hem mo stap aninit long hem olsem we joij i stap aninit long Kraes. Long joij, God i givim man blong hem i kam lida long jioj mo hem i tijim Baebol long jioj. Man mo woman tufala i gat semak hae praes long ae blong God be oli gat defren wok long famle mo long jioj.

Jisas i kambak bakegen

Olsem we Jisas i bin go antap long ples we God Papa hem i stap, bambae hem i kambak bakegen long bodi blong hem long wan fasin we olgeta man oli save luk long hem, mo we hem i soemaot bigfala paoa. Long taem ia hem bae i mekem olgeta man i girap bakegen aot long ded, mo hem i jajem olgeta, mo hem i finisim ol wok blong hem blong sevem olgeta man we God Papa i givim long hem, mo hem i stanemap ples we bambae God hem i king blong hem gogo i no save finis. Ples ia hem i wan niufala wol we i no gat ol devel blong spolem hem, i no gat sik no ded i stap, mo i no gat wan man nating we oli harem nogud, mo long ples ia evri samting i givim olgeta ona i go long God oltaem. Long taem we bambae Jisas i jajem olgeta man hem bae i seraotem olgeta i go long tu grup, wan we bae oli go long niufala wol we Kraes i stap long hem we i no save finis samtaem, mo narafala grup i go long hel we hem tu i no gat en blong hem.  I no gat wan man nating we hem i save se wanem taem bae Jisas i kambak bakegen.